भाद्र २३, २०७२- जिल्ला प्रशासन कार्यालय सप्तरीले भारदहमा थप हिंसा हुन सक्ने भन्दै बुधबार दिउँसो २ बजेदेखि बिहीबार बिहान ६ बजेसम्म कर्फ्यु लगाएको छ । प्रमुख जिल्ला अधिकारी बीरेन्द्रकुमार यादवका अनुसार भारदह बजार क्षेत्रमा कर्फ्यु लगाइएको छ ।
उत्तरमा पोर्ताह गाविस भवनदेखि ५ सय मिटर उत्तरसम्म, पश्चिममा ट्याम्पो स्ट्यान्डदेखि ५ सय मिटर दक्षिणसम्म, पूर्वमा कंकालीनी मन्दिरदेखि ५ सय मिटर पूर्वसम्म र दक्षिणमा चकरदहीको पुलदेखि ३०० मिटर दक्षिणसम्मको क्षेत्रमा कर्फ्यु लगाइएको जिल्ला प्रशासन कार्यालयले जनाएको छ ।
यसैगरी कार्यालयले कोशी व्यारेजदेखि बलान खोलासम्म राजमार्गको पाँच सय मिटर दायाँबायाँ निषेधित क्षेत्र तोकिएको छ ।
...
सप्तरीको भारदमा प्रहरीको गोली लागी एक जनाको मृत्यु भएको छ । गोली लागेर सप्तरीको पोर्ताह गाविस- १ का ६० वर्षीय रामकिसुन राउनको मृत्यु भएको छ ।
भारदहमा नै भदौ १ गते प्रहरीको गोली लागी एकजनाको मृत्यु भएको थियो ।
...
मधेसी मोर्चा सम्बद्ध प्रदर्शनकारीहरु राजमार्ग केन्द्रित भएपछि मंगलबार राति प्रहरी स्कर्टिङमा समेत सवारीसाधन सञ्चालन हुन सकेन । सप्तरी अन्तर्गत पूर्व–पश्चिम राजमार्ग खण्डको विभिन्न स्थानमा रुख ढालेर अवरोध गरेपछि प्रहरी स्कर्टिङमा पनि सवारीसाधन सञ्चालन हुन नसकको हो ।
यता निरन्तरको बन्दका कारण यहाँको जनजीवन अक्रान्त बन्दै गएको छ । बाटोमा रहेको ढुंगा, काठको मुढा लागयतका अबरोध हटाउन खोज्दा कञ्चनपुरमा प्रहरी र प्रदर्शनकारीबीच झडप भएको छ । दुबै तर्फबाट ढुंगा हानाहान भइरहेको छ ।
आज बिहान साढे नौबजे प्रहरीले राजमार्गको अवरोध हटाउन खोज्दा भारदहमा प्रहरी र प्रदशर्नकारीबीच झडप भएको छ । प्रदर्शनकारीले प्रहरीलाई लक्षित गरेर ढुंगा हानेपछि भीडलाई तितिरबितर पार्न प्रहरीले २३ राउन्ड अश्रुग्यास प्रहार गरेको छ ।
अश्रुग्यास लागेर एकजना प्रदर्शनकारी सामान्य घाइते भएका छन् । उनको स्थानीय अस्पतालमा उपचार भइरहेको छ । प्रहरीले १० राउन्ड हवाइ फयार गरेको छ ।
२६ दिनदेखि बजार पसल बन्द गराए पनि मागबारे सुनवाई नभएको भन्दै सप्तरीमा प्रदर्शनकारीहरुले आन्दोलनलाई राजमार्ग केन्द्रित बनएका छन् । भारदहमा एक दर्जन रुखहरु ढालेर राजमार्ग अवरुद्ध बनाइएका छन् । मोटो मोटो रुखहरु बाटोमा ढालेपछि राति बाटो सुचारु गर्न सम्भव नभएको हो ।
यस्तै भारदह, कञ्चनपुर, कदमाहा तथा रुपनीमा राजमार्गमै पाल टाँगेर प्रदर्शनकारी बसेका छन् । उनीहरुले प्रदर्शनस्थलमै खाना पकाउने, खाने व्यवस्था मिलाएका छन् ।
पूर्वबाट प्रहरी स्कर्टिङमा आएका ५ सय भन्दा बढी मालबाहक ट्रक तथा यात्रुबाहक बसलाई सुनसरीको झुम्कामै रोकिएको छ । यस्तै पश्चिमबाट प्रहरीले ल्याएको सवारीसाधन सिरहाको मिर्चैयामा रोकिएको छ । 'सवारीसाधन जसरी पनि सञ्चालनमा ल्याउनु भन्ने माथिको आदेशको छ,' सप्तरीका प्रमुख जिल्ला अधिकारी बीरेन्द्रकुमार यादवले भने, 'रोकिएको गाडी सञ्चालनको व्यवस्था मिलाउँदै छु ।'
यता मानव अधिकारका विभिन्न पक्षलाई ध्यानमा राखि जारि आन्दोललाई काठमाडौं बस्नेहरुले अनदेखा गरेकाले राजधानीमा सबैखाले आपूर्ती ठप्प गर्नेगरि आन्दोलन थालिएको फोरम नेपालका केन्द्रीय सदस्य शैलेन्द्र साहले बताए । जसरीपनि राजमार्ग सुचारु हुन नदिने योजना रहेको उनले बताए ।
'प्रशासनले जसरी पनि गाडी सञ्चालनमा ल्याउने र प्रदर्शनकारीहरु जसरी पनि सञ्चालन गर्न नदिने भनि अडानबीच बुधबार सप्तरीमा ठूलो झडप हुने सम्भावना छ,' नागरिक सञ्जाल सप्तरीका अध्यक्ष सुखराम यादवले भने, 'मुठभेड भन्दा वार्ता र सहमतिमा समस्या समाधान गर्नु उचित हुने छ ।'
